Nos los arpitans - Pathos et Epos [14]

Nos los arpitans - Pathos et Epos [14]

Èvident que lo rolo entèlèctual (lo solèt que nos entèrèsse inque) que lo cllèrgiér jouyét en Arpitania, coment d'alyor pertot en Eropa, fut possiblo porquè los homos de l'égllése érant étâ libèrâs des besouens matèrièls quotidièns franc per cél poplo que los amâve et los hayéssêt, mas surtot los cregnêve.
L'obstinâ, entétâ, atachement humen por lo pèchiê d'orgoly, lo pèchiê originâl, nèantmuens recomenciét a prèvalêr.
La pèrfèta sociètât de Crist imaginâye per l'égllése, et si emperfètament rèalisâye per son cllèrgiér, comenciét de s'enfonciér ètofâye de promèsses mancâyes. Per-cé et per-lé se comenciét a regardar outre, a rèflèchir sur la condicion humèna d'un pouent du vua difèrent, bien sovent protagonistos de cetes rèflèccion furont los prétres lyors mémos.
Dègot por la situacion de dètèrioracion de l'égllése, repugnance por l'odiox povêr de cèrtins prèlats, entolèrance des enjustices et malètre social, pousséront la difusion de nôves idês et la lyor capacitât de prisa ôgmentét.
Cela nôva cuche de gens, ni nôbla ni religiosa, que s'ére alâ formend chiéz les corts des sègnors, burôcrates, avocats, notéros [curiâls]etc., orendrêt avéve obtenu un amplo accès u savêr et a la cultura et recllamâve son drêt de participacion u povêr.
Et la mècanica des dfèrences, motor de l'histouère, redèmarrét.