Nos los arpitans - Pathos et Epos [7]

Nos los arpitans - Pathos et Epos [7]

L'humanitât, come la natura et totes les chouses matèrièles, at manca [besouen] d'una fôrce- motor por se dèvelopar. Ora ceta fôrce pôt pas ègzistar sens betar en champ la difèrence. Sens difèrences, rèèles ou potencièles, se produit pas d'ènèrg·ie, que seye ènèrg·ie èlèctrica ou entèlèctuèle. Sens difèrences los sistèmos se imobilisont et purréssont : o est la difèrence a produire l'ènèrg·ie nècèssèra u changement.
D'una cèrtêna façon se pôt dére que la pax romana avéve imobilisâ lo sistèma que a châ pou [petit a petit] s'ére renfremâ dens sè mémo balyent via a son autoconsomacion. Un procès durâ por des sièclos, mas complètament dèstructor. La sola chousa que réste de cela fôrce imanse que fut l'empiro roman est lo fragilo povêr spirituèl du Papa de Roma.
Lo contact dèstructor avouéc los poplos barbâros, que comencéront penetrar l'empiro, fit èxplosar cela ètincèla [èpelua] que enreyét
[comenciét] lo changement : difèrences, ènèrg·ies.
L'èxplosion fut violenta. Nôves maniére de vivre. Novèles enstitucions. Lengoues, una quantitât de nôves lengoues, ou de lengoues ancianes et jamés môrtes que, passàye u tamis du latin, tornéront en usâjo.
L'oprèssion romana fenia, gens, poplos et nacions comenciéront fére solèts.