Nos los arpitans - Pathos et Epos [13]

Nos los arpitans - Pathos et Epos [13]

Lo contact avouéc la Crouèx en Arpitania fut profond et fècond. Lo cristianismo, la cotema crètiena, s'enracenét dens los fondements de la via de noutra gens. Desot la crouèx et dens lo nom de la crouèx s'enstaléront usâjos que vito devegnéront tradicion. U nom de la Crouèx Senta se fesévont pactes et sèrments, a l'ombra de cela crouèx repoussâye grants et petiôds trovéront abri, de la Crouèx du Crist issuront sentes et sents mèrvelyox. Cela religion des humblos s'adaptâve pèrfètament a l'èsprit simplo et sobro des gens d'Arpitania.
D'ense se pôt tranquilament afirmar que avouéc l'avent de la religion crètiena l'època de l'antica Roma tèrmenét. D'ense en Arpitania, sens trop d'èxcès, se formét una fèrma habituda a la religion que empregnét la via des noutres populacions por des sièclos.
La vision que châque homo et châque fèna avéve de son prôpro ètat, la vision qu'ils partagiêvont de ceti mondo et du mondo de l'outre de lé fut litèralament tamisâye per la fouè crètiena ; ou, mielx oncor, per la pratica quotidièna de la fouè u Crist que l'égllése montrâve et empondâve [prèscrivéve].
Apartegnéront u cllèrgiér los èsprits ples cllârveyents et celos ples rètrogrâdes, o y furont prétres amouerox du savêr et prétres vèrgognox et trètros de lyor méma fouè ; u nom de Crist s'acomplesséront hèrôismos et enfâmies.
Humanitât et enhumanitât des vicissitudes humènes.