Nos los arpitans - Pathos et Epos [15]
Un côp de ples Arpitania fut la scèna d'Eropa.
O est sur los tèrritouèros d'Arpitania que lo mouvement rèformatôr protèstant, que s'ére dèchênâ en tota l'Eropa centro-sèptentrionala, trovét place. Cinqcent ans aprés céls evènements est venu lo moment de fére una calma rèflèccion et de la fére d'un pouent de vua arpitan.
Cela luta dantèsca que bolevèrsét et dèpeciét l'égllése univèrsâla avéve doux pivot : l'accion contra lo trop de privilèjos de l'égllése catolica et l'ègzigence d'organisar l'égllése sur bâses nacionâles et endèpendentes. Se jouyét, adonc, u milecinqcent, una partia historica per Arpitania et la misa [enjô] en juè fut pas solament d'ôrdre tèologico.
Centro de la querèla fut d'un coutâ la vela de Geneva, ses tèrritouèros, son endèpendence, et de l'ôtro lo duchè de Savouè, l'égllése que lo duc praticament dirigiêve, et la manca d'entèligence, un bien assèz râro a cela augusta famelye.
Cetos Savoia, et lyor entourajo de nôblos borgnos, uront desot lyors pieds los ples biôs tèrritouèros d'Eropa et suront se nen dèfére por la possèssion de tèrres que arrevéront a vêre ren que sur des papiérs.
Quand jamés s'est vua de gens si pou enracenâ et tant avida ?
Accueil 
