Nos los arpitans - Pathos et Epos [18]

Nos los arpitans - Pathos et Epos [18]

Mas revenens ux fêts de noutra patria histouère.
Charles-Emmanuel Iér de Savouè, dit lo Grant, porsiuvent son pèrsonal projèt de devenir rê pensat que Geneva sarêt étâ una parfèta royâla capitâla et armâ de son avoglla aviditât pèrdét la batalye fondementala de sa via. Lo patètico, pletout que grant, duc probâblament ut un ècllar de lumiére quand a d'Albigny que lui anonciéve la dèbâcla desét :  "De ceta escalada, Monsior, vos éde fêt una bella cacada".
Dedens cela nuet absurda se jouyét un dèstin possiblo. L'ècô de cela "nai asse naire que d'ancro" sone oncor u jorn d'houé por les rues de Geneva. Ah ! Charles-Emmanuel se t'usses utilisâ la parola et pas l'èpèye quinta Histouère t'arês regalâ a Arpitania.
O fut sens dôte lo sombro et enfllamâ rigorismo calvinista que enspirét los vèrs caôsticos de l'himno genevouès.
Mas - vox populi vox dei - En rèalitât se vos féde una lèctura atentiva de "Cé qu'è lainô", vos troveréd un rècit digno du mèlyor cinèma de guèrra : la gloriâ populèra, l'abjeccion d'un duc mocâ per de fènes armâyes de marmites, lo guignolèsco dèroulament des èvènements, tot l'èquipâjo d'una tragèdia comica.

Mas se l'Arpitania n'at jamés avu des ch·èfs dignes de ceti nom, el at tojorn avu un poplo grant, engèniox, pacifico et pacient.