Nos los arpitans - Ethnos [3]

Nos los arpitans - Ethnos [3]
bèrios [piérres]

Premiér nos ocupens des bèrios grants : les montagnes.
Bèques, crètes, dècllins [clêves] , los brâvos [jôlis] plans, les vâls [valâyes, vâlâdes] que constituâvont la râtelâ [èpena dorsâla] du tèrritouèro sur lo quint nos ancians 'l avévont decidâ d'habitar ja devant que l'histouère fusse comenciêe. De cél temps luen nos nen savens bien pou, los historiens se gâgnont lo vivre avouéc d'ôtres histouères bien ples profitâbles. Les racenes d'Arpitania sont donc emprimâyes sur los bèrios des noutres montagnes.
P. Daudry, l'historien-arquèologo, que at reportâ a la lumiére la splendida et mistèriosa Venus de Châtelyon en VdAoûta, afirme que "La ples pârt de noutra histouère est desot tèrra !"
Donc nos devantérs [ancians], por des rêsons que nos sont pas très cllâres dècidéront de s'enstalar et s'enracenar ux alentôrn des montagnes ; les mémes bèques [sonjons] que oncor u jorn d'houé, diéx-vingt mile ans aprés,'l ant a nom la méma parola que céls homos ancians empleyêvont : ARP (ou ALP). Milenèros aprés, los romans conquèrents, aprendéront des populacions somêses que celes montagnes avévont a nom AL[r]PIS.

Pués nos ocupens des bèrios petiôds : piérres réstâyes desot tèrra por des milenèros.
Situâde-vos a Aoûta ou a Sion (coment vos prèferâde), três-cinq mile ans devant la nèssance de Jèsus Crist, a cela méma pèrioda lo long du Nilo se dèvelopâve la granta civilisacion d'Èg·ipte.
... Et u méten [miluè] des Arpes occidentales un granta civilisacion humène comenciêve lessiér des traces pèrsistentes.