Nos los arpitans - Pathos et Epos [16]

Nos los arpitans - Pathos et Epos [16]

Come sovent arreve l'histouère a cél moment se balanciét entre lo tot et lo nèant. Naturèlament avouéc les - se - et le - mas - l'histouère se fét pas, portant travalyér a quârques hipotèses nos sèrvirat.
Por los Savoyards l'Èscalâda fut un fracas diplomatico oncor devant que militèro. La falyita du pilyâjo de la vela de Geneva donét una leçon historica : jamés un envasor put s'emparar, avouéc un'armê, d'un poplo. On pôt, avouéc la fôrce, conquerir et tenir des tèrritouèros et des biens, mas jamés on pôt dètenir un poplo. (... - plus rècent Viètnam docet - ; seye por los Francês que por los Amèriquens ...) La volontât populèra pôt batre totes les envincibles armês de ceti mondo.
Quand mémo l'honta du duc et de tota sa famelye por la dèféta genevouèsa enfluencét pesantament l'histouère.
L'encapacitât de cela famelye, a côsa de l'atavica fèblèsse d'èsprit que dejâ du comencement la signêve, de se fére un trèsor de cela dura leçon conduisét los Savoia jusqu'a l'acto fôl et absurdo d'abandonar la Savouè et de ruinar Arpitania.