Nos los arpitans - Pathos et Epos [11]

Nos los arpitans - Pathos et Epos [11]

Chesua [tombâye] Roma, un procèssus dècentralisatôr se dègagiét. Fut la fèudalitât. Entèrèsse pas icé discutar des enstitucions fèudales coment tâles, mas pletout vêre coment dedens cetes enstitucions se trôve la racena de la modèrna idê fèdèrâliste. Petiôdes comunotâts entèligentes et pèrfètament adaptâyes a lyor environament sont a mémo de s'ocupar de lyor mémes : a ceta dimension se dècllenche lo principo naturèl de l'autorègulacion.
Ôtrament les règlles vegnont emposâyes per d'ôtros.

Dens l'horizont fèudal, en outre, s'ècllaront asse-ben los principos de dèvolucion et de subsidièretât que sont, houé lo jorn, fondemental por imaginar Arpitania.
Lo mot dèvolucion l'emplyens por endicar la concession de povêrs de la pârt d'un govèrnement centrâl a favor d'un govèrnement local ou règ·ional sur la bâsa du principo de subsidièretât. La subsudièretât se fonde sur la costatacion que come semble illicito enlevar ux endividus cen que ils pôvont acomplir avouéc les lyors fôrces et les lyors capacitâts por lo confiar [remetre] a la comunotât, de la méma maniére est pas justo remetre [confiar] a una maj·or et ples hôta enstitucion cen que per les ples petiôdes et enfèriores pôt étre fêt.
Coment se vêt lo principo de subsudièretât est oncor devant que un principo organisatif du povêr, un principo antropologico que èxprime una concèpcion globale de l'homo et de la sociètât, por laquinta l'engond [lo gond] du systèmo juridico est la pèrsona humena, seye coment individu que come liem relacional.