Nos los arpitans (4)

Nos los arpitans

4.
Pregnens ora en considèracion la seconda partia de la devisa "Bien fére et lèssiér dére".
"... lèssiér dére." En rèflèchéssent sur cetes doves parole nos vint en devant [nos nos rapelens de] la fâbla de la cigâla et la fromia. Oh! Coment chantâve cela cigâla ... Mas, a la fin, quand l'hivèrn fut venu ...
Qui n'at jamés vu lo sorire silenciox et mocœr d'un des noutres velyârds front a un blagœr, pôt pas comprendre cen que "... lèssiér dére." signifie en Arpitania.
Dedens cél sorire est recelâye tot lo Savêr Arpitan : porquè se por survivre o fôt savêr bien fére, por bien fére o fôt bien savêr !
Obsèrvar et aprendre des noutres mémes fôtes, dedens lo pacient silence de qui ame cen que est et cen que fét. Amôr por cen que on est, amôr por la tèrra yô qu'on vit.
D'inque lo tempèrament bon et silenciox des populacions arpitanes. D'icé les trèts benvelyants du caractèro de noutres gens.
Mas clèmence et endulgence, que dèrivont dirèctament de la cruditât de la via, fôt pas les confondre avouéc una tolèrance sans discriminacion.
Ceta distance spirituèla n'est ren d'ôtro que l'index d'un supèrior savêr bien dètèrmenâ, que vat drêt a l'èssencièl et que jamés se fét dèroutar avouéc des passions inutiles.