Nos los arpitans - Pathos et Epos [21]Lo moment mémo que uno stupido duc, que voléve fére lo rê, et son avido premiér ministre ant châtrâ lo futur de lyors poplos, l'âbro arpitan de noutron futur est étâ plantâ. Noutra gens at comenciét a prendre conscience de la difèrence et lo motor de l'histouère s'est betâ a marchiér.
Nos n'ens pas des armâs a betar sur lo champ, ni n'ens d'ârmes de dèstruccion, ni d'ôtres sâletâs de guèrra ; nos champerens sur lo platél de la balance : cultura, cœr, veretât et tota la fôrce des noutres idês.
La premiére veretât est ceta magnfica lengoua que nos parlens et nos ècrivens, ceta lengoua, que sur cetes pâges trôve nôva via, ceta lengoua est noutron patrimouèno. Ceta lengoua est lo fil d'or que grope l'Arpitania, gllètent entre lors les arpitans dèpèrdus dedens três ètats difèrents et crèent lo
continûm historico que nen fonde l'ègzistence. Ceta lengoua est lo simbolo sonoro d'una cultura matèrièla seculèra, èxprèssion d'una unitât que at travèrsâ lo temps.
Dedens ceta cultura est renfremâ lo trèsor inèstimâblo de se savêr adaptar a la natura come a l'histouère, ou, en d'ôtres paroles, de savêr atendre que l'hivèrn passésse.
- ... a continuar -