Nos los arpitans - Pathos et Epos [6]Les chouses se passéront pas tot d'un côp. A châ pou [
pou a pou] l'ôtoritât centrâla s'assopét, les cèrtitudes sur justice, armâ et organisacion sociale manquéront. Los poplos que jusq'adonc érant étâs èxcllus des biens de l'empiro comencéront fére prèssion ux confins imaginent d'avance lo grôs boutin que los ategnéve.
Vito cen que réstâve de la fôrce militèra romana fut emportâ : o furont los barbâros !
Y fut sang et fuè, les dèstruccions arrevéront jusq'a la
vela ètèrnèla, bolevèrsent profondament los èsprits du temps : un ôrdre que semblâve fixâ por tojorn ut fin ; tot cen que ére solido devegnét liquido. Mas los Barbâros erant verément des barbâros ?
En atendent o fôt dére que y fut una nôva fèconda vouagnèson [
senalyes] humèna, pués o fôt aj·outar que étot [
asse-ben] les enstitucions uront un secossa vitale, l'entiéra gèografia du mondo fut redèssinâye.
Et enfin o fôt pas oublar que fut franc adonc que sur la scèna de l'histouère, avouéc tota sa fôrce rèvolucionèra, se presentét lo Cristianismo et que de cél moment por châque homo fut possiblo un èspouèr de salut.
Comenciét donc avouèc lo Moyen-Âjo una granta època de libèracion et de renèssance humèna.
- ... a continuar -