Nos los arpitans - Ethnos [2]

Nos los arpitans - Ethnos [2]
Nos lo savens : l'histouère est fêta de la via et la môrt de la poura gens, mas cen que réste sont los noms des rês

A la mêtiêt du sèziémo sièclo qui fusse alâ de Fribôrg a Lyon en passent, betens por Aoûta ou por Geneva, 'l arêt jamés changiê lengoua. Mas cél voyagior du milecinqcent 'l arêt sûr pas avu la méma concèpcion de nacion que n'ens a nos jorns. Por noutron obscur voyagior cél dèplaçament sarêt étâ un passâjo d'una propriètât a l'ôtra, de la tèrra d'un sègnor a cela d'un ôtro.
D'ôtra pârt noutron voyagior 'l arêt pas avu niona idê u regârd d'un ètat ; lo Bon Diô et la bôna sôrt sariant étâyes les soles entitâts supèriores a les quintes se refére. Mas, bien que 'l usse avu de sa pârt ren que lo Bon Diô et sa fôrce fisica, ceti mondo ére pas afrox por lui, ni drôlo, ni particuliérament dèsagrèâblo.
A pârt la lengoua les gens que rencontrâve por chemin condivisâvont avouéc lui la méma vision du mondo, la méma façon de travalyér la tèrra et d'amènagiér l'armalye, la méma façon de batir mêson et los mémos sents a preyér a l'égllése.
Pendent lo cors de l'an celes gens fasévont les mémes fétes, et, surtot, la ples granta pârt du fruit du lyor travaly fenesséve dens les mans d'una pouegnê de famelyes. Mas tot cen ére jugiê normal, coment normal ére ètre propriètât de quârq'un, et changiér de mêtre entre princes, princèsses, ducs, èvèques et rês.
Adonc ora que nos avens ècllarâ que est pas l'histouère des sègnors cela que nos entèrèsse, mas cela des gens petiôdes et sensa nom : ora o est temps de nos ocupar des bèrios [piérres].